Bangkok - Phuket - Pantong

Nochdäm ich mich i Bangkok no mitäm wichtigschtä versorgt hat (Thai sim chartä z.b.) und verschiedäni möglichkeitä für dä public transport usprobiert ha (voralläm äs wasser taxi hät sich glohnt, wills ufäm fluss kann stau hät unds fascht nüt choschtäd) hanich eigäntlich numäno druf gwartäd bis min zug richtig südä losfahrt.
Am bahnhof acho ischer in sinn cho dassi jo no gar ka proviant für ä 12 stündigi zugfahrt dabii ha. leider häts am kiosk aber numä bier und chips geh, egal au öpis. ich aber scho gliu drufabä gmärkt das das jo gar nid nötig isch, ich bi jo i thailand, do lauft nämlich all 10min irgänd öpärd dur dä zug und verchauft riisgricht, ztrinkä oder andäri sachä zu fairä priisä, ich bi jo schliässlich au i dä 2. klass wo us 95% Thais bestoht. Dä 2. klass wagä bestoht us vilnä 2er abteil wo so agordnäd sind wiä bi üs 4er. A dä decki hangäd ventilatorä als klimaalag ;). nochdäm s'dänn mol langsam dunkäl wordä isch hät dä än agstelltä us dänä 2er sitz 2 better gmacht, und zwar überänand. so ischäs dänn eigäntlich ganz OK gsi zum reisä (obwohl ich zwüschädinnä nid ha chönä schlofä).

Am 4täl ab 5i hetämo dänn söllä i Surat Thani acho, drum bi ich und äs Kanadische päärli wo äs abteil hinder mir gsi isch am 5i ufgschtandä und händ üs grichtäd. aber wiä chents anderscht si, viel zfrüäh. zum glück hät irgänd öpärd ä chli english chönä und üs gsaat äs goht no öpä 2 stund... also simmer nomol häräglägä und hand gwartäd bis dä konduktör cho isch, mitärä lischtä wär wänn mu usstiegä und die äntsprächändä person gweckt hät (da isch no service, do cha d'sbb no öpis lärnä!!).
Vo Surat Thani ischäs dänn zerscht mitämä grossä bus zum nörschtä umverteiligs zenter gangä, vo det mitämä chlinä nomol äs bitzli wiiter und dänn wieder mitämä gross dänn uf Phuket. vo det hani dänn äs taxi uf Patong gno wo mi dä Thorsten mitäm roller abgohlt und is hotel (also hotel isch übertriibä, ich ha eifoch dä room, alläs anderi inkl. butzä muni sälber, dafür ganz günschtig für das was büütäd) brocht hät. Zum mir chli alläs zaagä simmer dänn an strand und spöter no tüchtig in usgang.

Dubai - Bangkok

Nochdäm ich dä letzti Pricht gschribbä ha, hanich mich mol gwundäräd wiso äs Gate nonid ufgmacht hät obwohls vodä Ziit her eigäntlich heti mösä. Nochdäm ich d'Abflug Taflä nomol agluägäd ha hani gmärkt dass i zwüschädziit äs Gate gwächsläd hat und än Boarding scho agfangä hät. Wiä nid anderscht z'erwartä hani dänn eifoch voräm Flüger nomol chli wartä dörfä.
Dä Flug sälber, im A380! isch ganz OK gsi, ich ha än mega Sitz gha mit kilometerwiis Beifreiheit und a agnähmi Nochborin. Im Prinzip hani eh dä ganz Flug durä dösäd (inkl. öpä 10 Simpson Folgä), gschlofä und gässä. Aber isch scho gail wänn eifoch so richtig chasch in Sitz iä liegä :).



I Bangkok dänn häts scho riesä Schlangänä vor dä Zollbeamtä gha und wonich dänn mol ändlich dracho bi hani gmächt dassi äs 'Arrival & Departure' Zätäli nonid usgfüllt ha (vowo sötti da au wüssä? hanis ächt verschlofä?). Also Zätäli suächä (sind leider usgangä... drum ischäs nomol länger gangä), usfüllä und wieder astoh. Dabi hani grad no immä Franzos gholfä (söt umbädingt wieder Franz. üäbä) will er praktisch ka Inglish hät chönä.
In Innästadt, genauer ad Khaosan Road, bini mitäm AirportExpress gfahrä wo ganz OK gsi isch, het aber dänkt dassäs schnäller go würd. Nochdäm ich det chli umägirräd bi hanich mich fürs 'New Joe Inn' entschidä. Det hät halt nuno Doppälzimmer gha. Zum glück ischäs aber ganz ordändlich und au finanziäll im Rahmä (voralläm bini scho richtig durchschwitz gsi, au ka wunder bi 32° und uf dä schnörrä).
Leider hätmi dänn mis närvige Nasäblüätä no chli langer ufäm Zimmer ghaltä wiäni het welä. Geg di 12 am obig Ortsziit hanis dänn glich no usä gschafft. Äs isch immerno d'höll los gsi uf dä Stross. Noch äs par schritt hanich mich dän für irgänd äs Reschti entschiedä wos Bier und öpis z'ässä geh hät. Und dänn ischäs abgangä, än Frauäkampf grad vor mir... zerscht riesst die einti di anderi uf dä Bodä, dänn grossi Diskussion, dänn chunt dä nörscht und nimmt di erschti mit is näbädgässli vür 2 min. Und öpä 10 min spöter chunt nomol än Typ und schlot uf si i. Schräääg...
Drum binich dänn au mol wieter zogä, eigäntlich richtig Hostel, ha dänn aber über Luutsprächer Musik und geschwätz ghört womi azogä hät. Äs sind di 'rotä' Demonstrantä wo grad um dä Eggä ä riesä Veranstaltig abhaltäd. Für mich erschiends ganz friedlich, ka Polizei und alli luägäd mi fründlich ah (vilicht liets a mim rotä T-Shirt). Äs isch unglaublich, mittlärwiilä ischäs 20 ab 2 am morgä und äs isch immerno gliichviel los do. I dä zwüschädziit hanich mich mol mit chli Wasser iideckt und än ruhigä Eggä gsuächt zum diä Ziilä zschribä. - Langsam aber sicher machich mich wieder uf richtig Hostel obwohl dä Stimmig irgändwiä toll isch, aber ich wot eigäntlich dä tschät-läck so schnäll wiä möglich los ha und mich schnäll a die lokali Ziit apassä (jetzt frogt sich wafür Ziitä dä typischi Thai hät wänn jetzt no überall d'Höll los isch, aber egal...).
Ich höhr jetzt uf jedäfall uf tippä und hoff dassich das gschribäne so schnäll wiä möglich uäladä cha...
Guät Nacht!



Nochtrag: Isch halt chli länger gangä bis da online cho isch...

Zürich - Dubai

Noch tagelangäm Büro und Zimmer rummä (so dass d'Mirna au chli Platz hät ;) hanis ändlich gschaft. Bepackt mit öpä 23kg Gepäck (irgändwiä ismo schwärer vorcho...) hani am Check-in Schalter dörfä öpä ä halb Stund astoh (heti doch liäbär no äs Bier drunkä dihei) und dänn däfür grad chli mösä Gas geh so dassis no uf dä Flugi gschaft ha, wobi ich schlussändlich nomol wartä ha mösä und dänn glich no zu mim Bier cho bi ;).
Dä Flug sälber isch agnäm gsi, dank änärä nättä Familiä uns wohrschindlich Indiä oder Umgäbig hanich chönä dä Platz tuuschä und ha dänn än Fänschter Platz gha. Aber äs beschte isch gsi dass dä Sitz näbädra frei gsi isch (so wis usgeh hät als einzigä). Bim Ässä ischänä dänn aber bi mir äs Chicken usgangä aber Pasta mit chli Rotwii isch au guät gsi ;)
So und jetzt sitzi i Dubai ufämä 'Liegestuähl' am und nutz äs WLAN (isch jo scho krass, dass da i Züri nid gratis isch) zum mini erschtä imprässionä niedertschriibä...
Ich hoff äs goht im gliich agnämä Stiil so wiiter!